കുഞ്ഞാലിയുടെ രക്തസാക്ഷിത്വത്തിന് 42 വയസ്സ്; വിപ്ലവ   നായകന്റെ ഓര്‍മകളില്‍ ടി.കെ കോളനി |

പൂക്കോട്ടുംപാടം: ഏറനാട്ടിലെ കമ്യൂണിസ്റ്റ് പ്രസ്ഥാനത്തിന് വേരോട്ടമുണ്ടാക്കിയ സഖാവ് കുഞ്ഞാലിയുടെ നിറം മങ്ങാത്ത ഓര്‍മകളിലാണ് ടി.കെ കോളനി ഗ്രാമം. അമരമ്പലം പഞ്ചായത്തിലെ മലയോര കുടിയേറ്റ മേഖലയായ ടി.കെ കോളനി അറിയപ്പെടുന്നതുതന്നെ കുഞ്ഞാലി കോളനി എന്ന പേരിലാണ്. പാവപ്പെട്ടവന് ഒരു തുണ്ടു ഭൂമിയെന്ന ലക്ഷ്യവുമായി സമര രംഗത്തിറങ്ങിയ കുഞ്ഞാലിയുടെ കര്‍മമേഖലകളില്‍ പ്രഥമ സ്ഥാനമാണ്  ടി.കെ കോളനിക്കുള്ളത്. ഇന്നും വികസനം അധികമെത്തിയിട്ടില്ലാത്ത ടി.കെ കോളനിയിലെ മണ്ണിനോടും പ്രകൃതിയോടും മല്ലടിച്ചിരുന്ന കര്‍ഷകര്‍ക്ക് ആശ്വാസമേകുന്ന സാന്നിധ്യമായിരുന്നു സഖാവ് കുഞ്ഞാലി. നിലമ്പൂരിന്റെ പ്രഥമ എം.എല്‍.എ എന്ന പദവിലേക്ക് കുഞ്ഞാലിയെ എത്തിച്ചതും ഈ ജനകീയ മുഖമായിരുന്നു. രക്തസാക്ഷിത്വത്തിന്റെ 42ാം ആണ്ടിലും ജീവനര്‍പ്പിച്ച മണ്ണ് കുഞ്ഞാലിയോട് നീതി പുലര്‍ത്തിയോ എന്നതും പഴമക്കാര്‍ക്കിടയില്‍ ഉയരുന്ന ഉത്തരം കിട്ടാത്ത ചോദ്യമാണ് . 1998ല്‍ നിര്‍മിച്ച ടി.കെ കോളനിയിലെ ചിതലരിച്ചു തുടങ്ങിയ കുഞ്ഞാലി സ്മാരകവും വെടിയേറ്റു വീണ ചുള്ളിയോട് വര്‍ഷന്തോറും നടത്തുന്ന അനുസ്മരണവുമാണ്  വിപ്ലവനായകനു പാര്‍ട്ടി നല്‍കുന്ന ആദരവ്.

 ഏറനാടന്‍ പോരാളി ഓര്‍മയായിട്ട് 42 വര്‍ഷം

സഖാവ് കുഞ്ഞാലി

പൂക്കോട്ടുംപാടം: ഏറനാടിന്റെ വിപ്ലവ നായകന്‍ സഖാവ് കുഞ്ഞാലി ഓര്‍മയായിട്ട് 42 വര്‍ഷം തികയുന്നു. 1969 ജൂലായ് 26ന്  പൂക്കോട്ടുംപാടം ചുള്ളിയോടുവെച്ചാണ് കുഞ്ഞാലിക്ക് വെടിയേറ്റത്. ഏറനാട്ടിലെ  കുടിയേറ്റ സമരങ്ങളുടെ വിപ്ലവ നായകനായ കുഞ്ഞാലിയുടെ കര്‍മരംഗം ഇന്നത്തെ  നിലമ്പൂര്‍ താലൂക്ക് ഉള്‍പ്പെടുന്ന ഏറനാടിന്റെ ഭാഗമാണ്. പാവപ്പെട്ടവന്റെ  ദുരിതം തീര്‍ക്കുന്നതിനായി ജീവിച്ച കുഞ്ഞാലി 1960കളിലാണ് തോട്ടംമേഖലയിലെ  തൊഴിലാളികളെ പങ്കെടുപ്പിച്ചുകൊണ്ട് ഏറനാട്ടില്‍ പോരാട്ടരംഗത്തിറങ്ങുന്നത്.  എം.എല്‍.എ ആയിരിക്കെ വെടിയേറ്റുമരിച്ച ഏക നേതാവാണ് കുഞ്ഞാലി.  അദ്ദേഹത്തിന്റെ സമരങ്ങളുടെ തീവ്രതയും തൊഴിലാളികളോടുള്ള അടുപ്പവും മലയോരജനത  ഇപ്പോഴും സ്മരിക്കുന്നു എന്നതിന് തെളിവാണ് കുഞ്ഞാലിയുടെ പേരില്‍  ഉയര്‍ന്നുനില്‍ക്കുന്ന പാര്‍ട്ടിമന്ദിരങ്ങള്‍. വെടിയേറ്റ്  രണ്ടുദിവസങ്ങള്‍ക്കുശേഷം ജൂലായ് 28നാണ് കോഴിക്കോട് മെഡിക്കല്‍ കോളേജില്‍  കുഞ്ഞാലി മരിക്കുന്നത്. ഇതിനുശേഷം ജൂലായ്26 മുതല്‍ മലയോരമേഖലയില്‍ കുഞ്ഞാലി അനുസ്മരണം സംഘടിപ്പിക്കാറുണ്ട്.